mahfil mein aaj marsiya-KHwani hi kyun na ho

mahfil meñ aaj marsiya-ḳhvānī hī kyuuñ na ho

āñkhoñ se bahne dījiye paanī hī kyuuñ na ho

nashshe kā ehtimām se rishta nahīñ koī

paiġhām us kā aa.e zabānī hī kyuuñ na ho

aise ye ġham kī raat guzarnā muhāl hai

kuchh bhī sunā mujhe vo kahānī hī kyuuñ na ho

koī bhī saath detā nahīñ umr-bhar yahāñ

kuchh din rahegī saath javānī hī kyuuñ na ho

is tishnagī kī qaid se jaise bhī ho nikāl

piine ko kuchh bhī chāhiye paanī hī kyuuñ na ho

duniyā bhī jaise taash ke pattoñ kā khel hai

joker ke saath rahtī hai raanī hī kyuuñ na ho

tasvīr us kī chāhiye har haal meñ mujhe

pāgal ho sar-phirī ho divānī hī kyuuñ na ho

sonā to yaar sonā hai chāhe jahāñ rahe

biivī hai phir bhī biivī purānī hī kyuuñ na ho

ab apne ghar meñ rahne na deñge kisī ko ham

dil se nikāl deñge nishānī hī kyuuñ na ho

mahfil mein aaj marsiya-KHwani hi kyun na ho

aankhon se bahne dijiye pani hi kyun na ho

nashshe ka ehtimam se rishta nahin koi

paigham us ka aae zabani hi kyun na ho

aise ye gham ki raat guzarna muhaal hai

kuchh bhi suna mujhe wo kahani hi kyun na ho

koi bhi sath deta nahin umr-bhar yahan

kuchh din rahegi sath jawani hi kyun na ho

is tishnagi ki qaid se jaise bhi ho nikal

pine ko kuchh bhi chahiye pani hi kyun na ho

duniya bhi jaise tash ke patton ka khel hai

joker ke sath rahti hai rani hi kyun na ho

taswir us ki chahiye har haal mein mujhe

pagal ho sar-phiri ho diwani hi kyun na ho

sona to yar sona hai chahe jahan rahe

biwi hai phir bhi biwi purani hi kyun na ho

ab apne ghar mein rahne na denge kisi ko hum

dil se nikal denge nishani hi kyun na ho