mahsus ho raha hai ki duniya simaT gai

mahsūs ho rahā hai ki duniyā simaT ga.ī

merī pasand kitne hī ḳhānoñ meñ baT ga.ī

tanhā.iyoñ kī barf pighaltī nahīñ hanūz

va.adoñ ke e'tibār kī bhī dhuup chhaT ga.ī

ham ne vafā nibhā.ī baḌī tamkanat ke saath

apne hī dam pe zinda rahe umr kaT ga.ī

daur-e-ḳhirad vo daur-e-ḳhirad hai ki kyā kaheñ

qīmat baḌhī hai fan kī magar qadr ghaT ga.ī

'sarvat' har ek rut meñ lapeTe rahī jise

vo nā-murād aas kī chādar bhī phaT ga.ī

mahsus ho raha hai ki duniya simaT gai

meri pasand kitne hi KHanon mein baT gai

tanhaiyon ki barf pighalti nahin hanuz

wadon ke e'tibar ki bhi dhup chhaT gai

hum ne wafa nibhai baDi tamkanat ke sath

apne hi dam pe zinda rahe umr kaT gai

daur-e-KHirad wo daur-e-KHirad hai ki kya kahen

qimat baDhi hai fan ki magar qadr ghaT gai

'sarwat' har ek rut mein lapeTe rahi jise

wo na-murad aas ki chadar bhi phaT gai