mahsus kaun karta hai ahl-e-wafa ka dard

mahsūs kaun kartā hai ahl-e-vafā kā dard

ahl-e-vafā kā dard hai ye to balā kā dard

dukh dard meñ sharīk sabhī ke rahā huuñ maiñ

ġhairoñ kā dard ho ki kisī āshnā kā dard

jaatā nahīñ hai dil ko kahīñ mere chhoḌ kar

ye dard-e-dil to ban gayā jaise sadā kā dard

tūfāñ se jis ne laḌte hue apnī jaan dī

koī samajh sakā na usī nāḳhudā kā dard

jis par nisār maiñ ne kiye apne jān-o-dil

de kar gayā hai mujh ko vo tark-e-vafā kā dard

jo zindagī ke zulm-o-sitam hañs ke sah gayā

kuchh bhī nahīñ hai us ke liye to qazā kā dard

jab bhī maiñ yaad kartā huuñ maazī ko ai 'qamar'

uThtā hai mere siine meñ us kī jafā kā dard

mahsus kaun karta hai ahl-e-wafa ka dard

ahl-e-wafa ka dard hai ye to bala ka dard

dukh dard mein sharik sabhi ke raha hun main

ghairon ka dard ho ki kisi aashna ka dard

jata nahin hai dil ko kahin mere chhoD kar

ye dard-e-dil to ban gaya jaise sada ka dard

tufan se jis ne laDte hue apni jaan di

koi samajh saka na usi naKHuda ka dard

jis par nisar main ne kiye apne jaan-o-dil

de kar gaya hai mujh ko wo tark-e-wafa ka dard

jo zindagi ke zulm-o-sitam hans ke sah gaya

kuchh bhi nahin hai us ke liye to qaza ka dard

jab bhi main yaad karta hun mazi ko ai 'qamar'

uThta hai mere sine mein us ki jafa ka dard