محسوس کون کرتا ہے اہل وفا کا درد

محسوس کون کرتا ہے اہل وفا کا درد

اہل وفا کا درد ہے یہ تو بلا کا درد

دکھ درد میں شریک سبھی کے رہا ہوں میں

غیروں کا درد ہو کہ کسی آشنا کا درد

جاتا نہیں ہے دل کو کہیں میرے چھوڑ کر

یہ درد دل تو بن گیا جیسے سدا کا درد

طوفاں سے جس نے لڑتے ہوئے اپنی جان دی

کوئی سمجھ سکا نہ اسی ناخدا کا درد

جس پر نثار میں نے کئے اپنے جان و دل

دے کر گیا ہے مجھ کو وہ ترک وفا کا درد

جو زندگی کے ظلم و ستم ہنس کے سہہ گیا

کچھ بھی نہیں ہے اس کے لئے تو قضا کا درد

جب بھی میں یاد کرتا ہوں ماضی کو اے قمرؔ

اٹھتا ہے میرے سینے میں اس کی جفا کا درد