mahsus kyun na ho mujhe beganagi bahut

mahsūs kyuuñ na ho mujhe begānagī bahut

maiñ bhī to is dayār meñ huuñ ajnabī bahut

-āsāñ nahīñ hai kashmakash-e-zāt kā safar

hai āgahī ke ba.ad ġham-e-āgahī bahut

har shaḳhs pur-ḳhulūs hai har shaḳhs bā-vafā

aatī hai apnī saada dilī par hañsī bahut

us jān-e-jāñ se qat-e-ta.alluq ke bāvajūd

us rahguzar meñ aaj bhī hai dilkashī bahut

is vaz-e-ehtiyāt kī zanjīr ke liye

maiñ ne bhī kī hai shahr meñ āvārgī bahut

msatānā-vār vādī-e-ġham tai karo 'sahar'

baaqī haiñ zindagī ke taqāze abhī bahut

mahsus kyun na ho mujhe beganagi bahut

main bhi to is dayar mein hun ajnabi bahut

-asan nahin hai kashmakash-e-zat ka safar

hai aagahi ke baad gham-e-agahi bahut

har shaKHs pur-KHulus hai har shaKHs ba-wafa

aati hai apni sada dili par hansi bahut

us jaan-e-jaan se qat-e-talluq ke bawajud

us rahguzar mein aaj bhi hai dilkashi bahut

is waz-e-ehtiyat ki zanjir ke liye

main ne bhi ki hai shahr mein aawargi bahut

msatana-war wadi-e-gham tai karo 'sahar'

baqi hain zindagi ke taqaze abhi bahut