main apni KHak se pahle diya banata hun

maiñ apnī ḳhaak se pahle diyā banātā huuñ

aur us ke baa'd koī rāsta banātā huuñ

shu'ā'eñ kaat ke TuuTe hue sitāre kī

usī ke taar se din kī qabā banātā huuñ

ye kār-e-saḳht bhī mere sipurd honā thā

maiñ barf-zār meñ ātish-kada banātā huuñ

sajā ke apnī jabīñ kā lahū hathelī par

usī kī aab se ik aa.ina banātā huuñ

maiñ ek tā.ir-e-nā-vāqif-e-ḳhatar kī tarah

havā kī zad pe nayā ghoñsla banātā huuñ

maiñ apne halqa-e-zanjīr kī vasātat se

sukūt-e-mahbas-e-jāñ meñ sadā banātā huuñ

ye shahr-e-jabr tirā naqsh-e-pā sahī lekin

maiñ ek naqsh-e-qadam dūsrā banātā huuñ

kisī fasīl pe likhtā huuñ ḳhvāhisheñ dar kī

kisī fasīl pe dast-e-du'ā banātā huuñ

kanār-e-āb jo 'at.har' ḳhiyām jalte haiñ

maiñ un kī raakh se dariyā nayā banātā huuñ

main apni KHak se pahle diya banata hun

aur us ke ba'd koi rasta banata hun

shu'a'en kat ke TuTe hue sitare ki

usi ke tar se din ki qaba banata hun

ye kar-e-saKHt bhi mere sipurd hona tha

main barf-zar mein aatish-kada banata hun

saja ke apni jabin ka lahu hatheli par

usi ki aab se ek aaina banata hun

main ek tair-e-na-waqif-e-KHatar ki tarah

hawa ki zad pe naya ghonsla banata hun

main apne halqa-e-zanjir ki wasatat se

sukut-e-mahbas-e-jaan mein sada banata hun

ye shahr-e-jabr tera naqsh-e-pa sahi lekin

main ek naqsh-e-qadam dusra banata hun

kisi fasil pe likhta hun KHwahishen dar ki

kisi fasil pe dast-e-du'a banata hun

kanar-e-ab jo 'athar' KHiyam jalte hain

main un ki rakh se dariya naya banata hun