میں باہیں کھول کے پورا شجر نہیں بنتا

میں باہیں کھول کے پورا شجر نہیں بنتا

سہارا بنتا ہوں پر اس قدر نہیں بنتا

دوام پاتی ہیں سینوں سے لگ کے تصویریں

بذات خود کوئی رستہ سفر نہیں بنتا

ترا کمال کہ مجھ کو گلے لگا لیا ہے

وگرنہ خستہ دیواروں سے گھر نہیں بنتا

دیار غیر میں اجناس بانٹنے والو

جڑوں سے ٹوٹ کے پودا شجر نہیں بنتا

نظر کے فیض کا انکار تو نہیں لیکن

گہر جو ہوتا نہیں ہے گہر نہیں بنتا

ہر ایک چیز کا نعم البدل ملا حارثؔ

مگر وہ عکس جو آئینے پر نہیں بنتا