main bichhDon ko milane ja raha hun

maiñ bichhḌoñ ko milāne jā rahā huuñ

chalo dīvār Dhāne jā rahā huuñ

karoḌoñ ḳhushk lab haiñ saath mere

samundar ko sukhāne jā rahā huuñ

musalsal āñsuoñ kī fauj le kar

maiñ sūraj ko bujhāne jā rahā huuñ

udhar kuchh log kab se ro rahe haiñ

unheñ Dhāras bañdhāne jā rahā huuñ

udhar marham lagā kar aa rahā huuñ

idhar marham lagāne jā rahā huuñ

ye duniyā ab kisī qābil nahīñ hai

qayāmat ko bulāne jā rahā huuñ

yahāñ milnā milānā kuchh nahīñ hai

magar maiñ ḳhaak chhāne jā rahā huuñ

jinheñ chehra badalnā ho badal leñ

maiñ ab parda uThāne jā rahā huuñ

jahāñ jā kar kabhī lauTā nahīñ maiñ

vahīñ phir jā ke aane jā rahā huuñ

huā sahrā-nashīñ phir 'farhat-ehsās'

use vāpas bulāne jā rahā huuñ

main bichhDon ko milane ja raha hun

chalo diwar Dhane ja raha hun

karoDon KHushk lab hain sath mere

samundar ko sukhane ja raha hun

musalsal aansuon ki fauj le kar

main suraj ko bujhane ja raha hun

udhar kuchh log kab se ro rahe hain

unhen Dhaaras bandhane ja raha hun

udhar marham laga kar aa raha hun

idhar marham lagane ja raha hun

ye duniya ab kisi qabil nahin hai

qayamat ko bulane ja raha hun

yahan milna milana kuchh nahin hai

magar main KHak chhane ja raha hun

jinhen chehra badalna ho badal len

main ab parda uThane ja raha hun

jahan ja kar kabhi lauTa nahin main

wahin phir ja ke aane ja raha hun

hua sahra-nashin phir 'farhat-ehsas'

use wapas bulane ja raha hun