میں بچھڑوں کو ملانے جا رہا ہوں

میں بچھڑوں کو ملانے جا رہا ہوں

چلو دیوار ڈھانے جا رہا ہوں

کروڑوں خشک لب ہیں ساتھ میرے

سمندر کو سکھانے جا رہا ہوں

مسلسل آنسوؤں کی فوج لے کر

میں سورج کو بجھانے جا رہا ہوں

ادھر کچھ لوگ کب سے رو رہے ہیں

انہیں ڈھارس بندھانے جا رہا ہوں

ادھر مرہم لگا کر آ رہا ہوں

ادھر مرہم لگانے جا رہا ہوں

یہ دنیا اب کسی قابل نہیں ہے

قیامت کو بلانے جا رہا ہوں

یہاں ملنا ملانا کچھ نہیں ہے

مگر میں خاک چھانے جا رہا ہوں

جنہیں چہرہ بدلنا ہو بدل لیں

میں اب پردہ اٹھانے جا رہا ہوں

جہاں جا کر کبھی لوٹا نہیں میں

وہیں پھر جا کے آنے جا رہا ہوں

ہوا صحرا نشیں پھر فرحت احساسؔ

اسے واپس بلانے جا رہا ہوں