main ek baat kahun gar tumhein bura na lage

maiñ ek baat kahūñ gar tumheñ burā na lage

'ajab nahīñ hai ḳhudā bhī agar ḳhudā na lage

vo maañ jo mere ujaḌne ke ġham meñ hai lāhaq

ḳhudā kare ki tujhe us kī bad-du'ā na lage

vo bad-nasīb shikārī haiñ ham nishāne par

jo ek tiir lage bhī to dūsrā na lage

banāo mai-kada koī haram ke naqshe par

ki mai-kada bhī ho lekin vo mai-kada na lage

maiñ us ko phuul na mārūñ vo itnī nāzuk thī

ki merā phuul kahīñ us ko zor kā na lage

hamāre jaise zabūñ-hāl naujavānoñ kī

ḳhudā kare kisī dushman ko bhī havā na lage

'ajab nahīñ hai tirā ‘dāniyāl-haidar' ho

pa dekhne meñ zarā ‘dāniyāl’ sā na lage

main ek baat kahun gar tumhein bura na lage

'ajab nahin hai KHuda bhi agar KHuda na lage

wo man jo mere ujaDne ke gham mein hai lahaq

KHuda kare ki tujhe us ki bad-du'a na lage

wo bad-nasib shikari hain hum nishane par

jo ek tir lage bhi to dusra na lage

banao mai-kada koi haram ke naqshe par

ki mai-kada bhi ho lekin wo mai-kada na lage

main us ko phul na marun wo itni nazuk thi

ki mera phul kahin us ko zor ka na lage

hamare jaise zabun-haal naujawanon ki

KHuda kare kisi dushman ko bhi hawa na lage

'ajab nahin hai tera ‘daniyal-haidar' ho

pa dekhne mein zara ‘daniyal’ sa na lage