main hun zalim ki aan-ban se KHush

maiñ huuñ zālim kī ān-bān se ḳhush

varna hai kaun āsmān se ḳhush

nā-ḳhushī kā ḳhayāl thā lekin

vo hue merī dāstān se ḳhush

is tarah bas meñ aa gayā koī

kar liyā maiñ ne phuul paan se ḳhush

is qadar ġham hai mere qātil ko

jis qadar maiñ huuñ imtihān se ḳhush

ḳhaak pahuñchegā vo sar-e-manzil

jo musāfir huā takān se ḳhush

ek ko jhiḌkī ek ko dhamkī

kaun hai aap kī zabān se ḳhush

chhoḌ kar dil ko dard jaa.e kahāñ

ye makīñ hai isī makān se ḳhush

paas koī pahuñch nahīñ saktā

is liye haiñ vo pāsbān se ḳhush

jān-o-dil donoñ aap le jaa.eñ

maiñ huuñ sau dil hazār jaan se ḳhush

sāqī-e-mai-farosh rahtā hai

apnī chaltī huī dukān se ḳhush

'nūh' ko chain umr bhar na milā

kyā hoñ vo apne imtihān se ḳhush

main hun zalim ki aan-ban se KHush

warna hai kaun aasman se KHush

na-KHushi ka KHayal tha lekin

wo hue meri dastan se KHush

is tarah bas mein aa gaya koi

kar liya main ne phul pan se KHush

is qadar gham hai mere qatil ko

jis qadar main hun imtihan se KHush

KHak pahunchega wo sar-e-manzil

jo musafir hua takan se KHush

ek ko jhiDki ek ko dhamki

kaun hai aap ki zaban se KHush

chhoD kar dil ko dard jae kahan

ye makin hai isi makan se KHush

pas koi pahunch nahin sakta

is liye hain wo pasban se KHush

jaan-o-dil donon aap le jaen

main hun sau dil hazar jaan se KHush

saqi-e-mai-farosh rahta hai

apni chalti hui dukan se KHush

'nuh' ko chain umr bhar na mila

kya hon wo apne imtihan se KHush