میں ہوں ظالم کی آن بان سے خوش
ورنہ ہے کون آسمان سے خوش
ناخوشی کا خیال تھا لیکن
وہ ہوے میری داستان سے خوش
اس طرح بس میں آ گیا کوئی
کر لیا میں نے پھول پان سے خوش
اس قدر غم ہے میرے قاتل کو
جس قدر میں ہوں امتحان سے خوش
خاک پہنچے گا وہ سر منزل
جو مسافر ہوا تکان سے خوش
ایک کو جھڑکی ایک کو دھمکی
کون ہے آپ کی زبان سے خوش
چھوڑ کر دل کو درد جائے کہاں
یہ مکیں ہے اسی مکان سے خوش
پاس کوئی پہنچ نہیں سکتا
اس لئے ہیں وہ پاسبان سے خوش
جان و دل دونوں آپ لے جائیں
میں ہوں سو دل ہزار جان سے خوش
ساقیٔ مے فروش رہتا ہے
اپنی چلتی ہوئی دکان سے خوش
نوحؔ کو چین عمر بھر نہ ملا
کیا ہوں وہ اپنے امتحان سے خوش
مأخذ:
Ejaz-e-Nooh (Pg. ebook-190 page-85)
- مصنف: محمد نوح صاحب نوح
-
- ناشر: اسرار کریمی پریس، الہ آباد
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.