main isi KHak se hun ghar bhi isi KHak mein hai

maiñ isī ḳhaak se huuñ ghar bhī isī ḳhaak meñ hai

merī parvāz magar vus.at-e-aflāk meñ hai

kyā lagā.egā mire tāj-e-junūñ kī qīmat

kyā ba-juz sang-o-ḳhazaf dāman-e-idrāk meñ hai

abr ko aag bujhāne se jo baḌh kar roke

itnī parvāz kahāñ sho.ala-e-saffāk meñ hai

chāhiye hī nahīñ mujh ko koī shāhāna libās

merī izzat isī pairāhan-e-sad-chāk meñ hai

sādgī ne mujhe rakkhā na kahīñ kā varna

chāñd tāroñ kā jahāñ bhī mirī imlāk meñ hai

qaid kamre meñ rahūñ yā kisī maidāñ meñ rahūñ

aisā lagtā hai mujhe koī mirī taak meñ hai

jis ke hone pe nahīñ miltā hai dariyā kā mizāj

itnā paanī to mire dīda-e-namnāk meñ hai

apne dāman se chhuḌāyā thā kabhī tū ne jise

phir vahī rang numāyāñ tirī poshāk meñ hai

kyā koī la.al-e-badaḳhshāñ bhī chhupā hai 'yāvar'

raushnī kis liye itnī ḳhas-o-ḳhāshāk meñ hai

main isi KHak se hun ghar bhi isi KHak mein hai

meri parwaz magar wusat-e-aflak mein hai

kya lagaega mere taj-e-junun ki qimat

kya ba-juz sang-o-KHazaf daman-e-idrak mein hai

abr ko aag bujhane se jo baDh kar roke

itni parwaz kahan shoala-e-saffak mein hai

chahiye hi nahin mujh ko koi shahana libas

meri izzat isi pairahan-e-sad-chaak mein hai

sadgi ne mujhe rakkha na kahin ka warna

chand taron ka jahan bhi meri imlak mein hai

qaid kamre mein rahun ya kisi maidan mein rahun

aisa lagta hai mujhe koi meri tak mein hai

jis ke hone pe nahin milta hai dariya ka mizaj

itna pani to mere dida-e-namnak mein hai

apne daman se chhuDaya tha kabhi tu ne jise

phir wahi rang numayan teri poshak mein hai

kya koi lal-e-badaKHshan bhi chhupa hai 'yawar'

raushni kis liye itni KHas-o-KHashak mein hai