main jis irade se ja rahi hun usi irade se laD paDungi

maiñ jis irāde se jā rahī huuñ usī irāde se laḌ paḌuñgī

mire sipāhī ko kuchh huā to maiñ shāhzāde se laḌ paḌuñgī

ye khel shāhoñ ke martabe kā hadaf baneñge hamāre mohre

maiñ bebasī meñ shikast khaa.e hue piyāde se laḌ paḌuñgī

maiñ apnī bastī kī kachchī galiyoñ se ishq kartī huuñ yaad rakhnā

agar jo achchhā burā kahegā amīr-zāde se laḌ paḌuñgī

asīr-e-naqsh-o-nigār mujh se nahīñ sambhaltā ye chāk-e-hastī

maiñ thak ga.ī to bikhartī miTTī se aur burāde se laḌ paḌuñgī

ye sabr kab tak nibhā.e jā.ūñ maiñ ḳhud se nazreñ churā.e jā.ūñ

jo shām-e-hijrāñ ne jaan khaa.ī har ek va.ade se laḌ paḌuñgī

main jis irade se ja rahi hun usi irade se laD paDungi

mere sipahi ko kuchh hua to main shahzade se laD paDungi

ye khel shahon ke martabe ka hadaf banenge hamare mohre

main bebasi mein shikast khae hue piyaade se laD paDungi

main apni basti ki kachchi galiyon se ishq karti hun yaad rakhna

agar jo achchha bura kahega amir-zade se laD paDungi

asir-e-naqsh-o-nigar mujh se nahin sambhalta ye chaak-e-hasti

main thak gai to bikharti miTTi se aur burade se laD paDungi

ye sabr kab tak nibhae jaun main KHud se nazren churae jaun

jo sham-e-hijran ne jaan khai har ek wade se laD paDungi