main jis mein gum hun wo mere KHuda kab aaega

maiñ jis meñ gum huuñ vo mere ḳhudā kab aa.egā

vo āb-zār vo shahr-e-havā kab aa.egā

milegā kab mire pairoñ ko intiḳhāb kā izn

maiñ chal rahā huuñ vo gum-rāsta kab aa.egā

khule raheñge kahāñ tak ye bādbāñ mere

zamīñ kī raushniyoñ kā pata kab aa.egā

kanār-e-jū-e-ravāñ se kanār-e-jāñ kī taraf

vo jaltā bujhtā huā silsila kab aa.egā

ye mere dil meñ parinde jo shor karte haiñ

inheñ salīqa-e-saut-o-sadā kab aa.egā

jaleñge kab mirī āñkhoñ ke jangaloñ meñ alaav

idhar vo khoyā huā qāfila kab aa.egā

maiñ ḳhud ko bhuul ke kis din use pukārūñgā

vo apne aap ko suntā huā kab aa.egā

main jis mein gum hun wo mere KHuda kab aaega

wo aab-zar wo shahr-e-hawa kab aaega

milega kab mere pairon ko intiKHab ka izn

main chal raha hun wo gum-rasta kab aaega

khule rahenge kahan tak ye baadban mere

zamin ki raushniyon ka pata kab aaega

kanar-e-ju-e-rawan se kanar-e-jaan ki taraf

wo jalta bujhta hua silsila kab aaega

ye mere dil mein parinde jo shor karte hain

inhen saliqa-e-saut-o-sada kab aaega

jalenge kab meri aankhon ke jangalon mein alaw

idhar wo khoya hua qafila kab aaega

main KHud ko bhul ke kis din use pukarunga

wo apne aap ko sunta hua kab aaega