main jitna KHush hun apne aap se utna KHafa hun

maiñ jitnā ḳhush huuñ apne aap se utnā ḳhafā huuñ

'ajab ik nafsiyātī kashmakash meñ mubtalā huuñ

jise apnā banā saktā huuñ us ko rad kiyā hai

jise apnā banā saktā nahīñ us kā huā huuñ

baḌī barjastagī se baat kar letā huuñ aksar

magar jab sochne lagtā huuñ kitnā sochtā huuñ

tujhe mā'lūm hai kahnā mirā karnā nahīñ hai

tujhe mā'lūm hai maiñ aadmī huuñ bevafā huuñ

mujhe ik ḳhvāb kā maqrūz Thahrāyā gayā hai

maiñ ik muddat se āñkheñ rehn rakkhe so rahā huuñ

mujhe sunñā na sunñā ek mushkil marhala hai

kabhī yak-laḳht sannāTā kabhī ik dam sadā huuñ

tavajjoh kā taqāza is qadar mujh se nahīñ kar

abhī bilkul abhī maiñ niiñd se so kar uThā huuñ

tujhe mā'lūm saarī ḳhūbiyāñ sab 'aib mere

tujhe mā'lūm hai achchhā huuñ maiñ kitnā burā huuñ

safar ik marhale ke baa'd karnā hai musalsal

kisī ik intihā ke baa'd maiñ be-intihā huuñ

koī mere qalam ko chand botal ḳhuun denā

ki maiñ tārīḳh apne vaqt kī likhne lagā huuñ

mire likkhe hue har lafz par tum ġhaur karnā

tumheñ mā'lūm ho jā.egā maiñ kitnā nayā huuñ

mirī taḳhlīq meñ 'āsim' ka.ī āmezisheñ haiñ

maiñ apne aap meñ miTTī huuñ paanī huuñ havā huuñ

main jitna KHush hun apne aap se utna KHafa hun

'ajab ek nafsiyati kashmakash mein mubtala hun

jise apna bana sakta hun us ko rad kiya hai

jise apna bana sakta nahin us ka hua hun

baDi barjastagi se baat kar leta hun aksar

magar jab sochne lagta hun kitna sochta hun

tujhe ma'lum hai kahna mera karna nahin hai

tujhe ma'lum hai main aadmi hun bewafa hun

mujhe ek KHwab ka maqruz Thahraya gaya hai

main ek muddat se aankhen rehn rakkhe so raha hun

mujhe sunna na sunna ek mushkil marhala hai

kabhi yak-laKHt sannaTa kabhi ek dam sada hun

tawajjoh ka taqaza is qadar mujh se nahin kar

abhi bilkul abhi main nind se so kar uTha hun

tujhe ma'lum sari KHubiyan sab 'aib mere

tujhe ma'lum hai achchha hun main kitna bura hun

safar ek marhale ke ba'd karna hai musalsal

kisi ek intiha ke ba'd main be-intiha hun

koi mere qalam ko chand botal KHun dena

ki main tariKH apne waqt ki likhne laga hun

mere likkhe hue har lafz par tum ghaur karna

tumhein ma'lum ho jaega main kitna naya hun

meri taKHliq mein 'asim' kai aamezishen hain

main apne aap mein miTTi hun pani hun hawa hun