main koi waqt nahin hun jo guzar jaunga

maiñ koī vaqt nahīñ huuñ jo guzar jā.ūñgā

hashr tak apne hī markaz pe Thahar jā.ūñgā

chaah kar bhī vo mujhe bhuul sakegā kyūñkar

ik kasak ban ke dil-o-jāñ meñ utar jā.ūñgā

aa.ine meñ bhī nazar aatā nahīñ koī javāb

vo nazar pher le mujh se to kidhar jā.ūñgā

ek muflis kā kare kyoñ ye zamāna afsos

maut aa.egī ḳhamoshī se guzar jā.ūñgā

merī jāgīr hai kyā terī 'ināyat ke sivā

le ke duniyā se yahī dāġh-e-jigar jā.ūñgā

merī āvāz dabā.egī kahāñ tak duniyā

maiñ sadā ban ke havāoñ meñ bikhar jā.ūñgā

haq-parastī ko maiñ buniyād-e-'ibādat samjhūñ

qaul badlūñgā nahīñ baat pe mar jā.ūñgā

nā-tarāshīda huuñ patthar mirī tauqīr hī kyā

tere hāthoñ meñ jo aa jā.ūñ sañvar jā.ūñgā

apnā dīvāna mujhe kah deñ agar vo 'sājid'

muskurāte hue duniyā se guzar jā.ūñgā

main koi waqt nahin hun jo guzar jaunga

hashr tak apne hi markaz pe Thahar jaunga

chah kar bhi wo mujhe bhul sakega kyunkar

ek kasak ban ke dil-o-jaan mein utar jaunga

aaine mein bhi nazar aata nahin koi jawab

wo nazar pher le mujh se to kidhar jaunga

ek muflis ka kare kyon ye zamana afsos

maut aaegi KHamoshi se guzar jaunga

meri jagir hai kya teri 'inayat ke siwa

le ke duniya se yahi dagh-e-jigar jaunga

meri aawaz dabaegi kahan tak duniya

main sada ban ke hawaon mein bikhar jaunga

haq-parasti ko main buniyaad-e-'ibaadat samjhun

qaul badlunga nahin baat pe mar jaunga

na-tarashida hun patthar meri tauqir hi kya

tere hathon mein jo aa jaun sanwar jaunga

apna diwana mujhe kah den agar wo 'sajid'

muskuraate hue duniya se guzar jaunga