main kya karun yahin karna hai intizar mujhe

maiñ kyā karūñ yahīñ karnā hai intizār mujhe

isī jagah to milā thā vo pahlī baar mujhe

bisāt-e-zīst pe baazī palaT bhī saktī hai

tirā nasīb jo mil jaa.e musta.ār mujhe

usī ne mujh ko banā kar sipurd tere kiyā

zarā salīqe se ai zindagī guzār mujhe

binā lagām ke baiThā diyā hai mālik ne

tū ḳhvāh-maḳhvāh samajhtā hai shahsavār mujhe

ḳhatā muaaf ho is kī bhī kyā zarūrat thī

barā.e naam jo baḳhshā hai iḳhtiyār mujhe

talāsh-e-rizq meñ ghar se nahīñ nikaltā agar

to karnā paḌtā mayassar pe inhisār mujhe

tū ai zamīr jahāñ mujh ko le ke baiThā hai

usī maqām pe rakhiyo tū barqarār mujhe

qasam na khā tirī fitrat se ḳhuub vāqif huuñ

hai terī va.ada-ḳhilāfī kā e'tibār mujhe

ye zindagī jo kahīñ chain se nahīñ guzrī

tamām umr rahī fikr-e-rozgār mujhe

maiñ in ḳhalāoñ meñ gumnām ho na jā.ūñ kahīñ

urūj-e-fan mirī dahlīz par utaar mujhe

main kya karun yahin karna hai intizar mujhe

isi jagah to mila tha wo pahli bar mujhe

bisat-e-zist pe bazi palaT bhi sakti hai

tera nasib jo mil jae mustaar mujhe

usi ne mujh ko bana kar sipurd tere kiya

zara saliqe se ai zindagi guzar mujhe

bina lagam ke baiTha diya hai malik ne

tu KHwah-maKHwah samajhta hai shahsawar mujhe

KHata muaf ho is ki bhi kya zarurat thi

barae nam jo baKHsha hai iKHtiyar mujhe

talash-e-rizq mein ghar se nahin nikalta agar

to karna paDta mayassar pe inhisar mujhe

tu ai zamir jahan mujh ko le ke baiTha hai

usi maqam pe rakhiyo tu barqarar mujhe

qasam na kha teri fitrat se KHub waqif hun

hai teri wada-KHilafi ka e'tibar mujhe

ye zindagi jo kahin chain se nahin guzri

tamam umr rahi fikr-e-rozgar mujhe

main in KHalaon mein gumnam ho na jaun kahin

uruj-e-fan meri dahliz par utar mujhe