maine aaram kiya chain to hasil na hua

maiñ ne ārām kiyā chain to hāsil na huā

niiñd aa.ī bhī to māhaul se ġhāfil na huā

merī āñkhoñ ne tujhe sirf tujhe dekhnā thā

koī manzar bhī kahīñ biich meñ haa.il na huā

kyā TaTole chalī jaatī haiñ tumhārī āñkheñ

kyā milegā mire siine meñ agar dil na huā

maiñ tire vāste badlā to bahut huuñ lekin

kuchh kamī rah ga.ī hogī tire qābil na huā

niiñd us ne hī basā.ī thī mirī āñkhoñ meñ

jo mire ḳhvāb kī tā'bīr meñ shāmil na huā

kis mohabbat pe karoge ye safar ḳhatm agar

muntazir koī tumhārā sar-e-manzil na huā

aa.ina dekhte ye soch ke Dar jaatā huuñ

maiñ kisī roz agar apne muqābil na huā

jism kartā hī chalā jā.egā be-sūd tavāf

dil agar kā'ba-e-'ushshāq meñ dāḳhil na huā

ab to ik aas pe tum tair rahe ho 'āsim'

kyā karoge agar us paar bhī sāhil na huā

main ne aaram kiya chain to hasil na hua

nind aai bhi to mahaul se ghafil na hua

meri aankhon ne tujhe sirf tujhe dekhna tha

koi manzar bhi kahin bich mein hail na hua

kya TaTole chali jati hain tumhaari aankhen

kya milega mere sine mein agar dil na hua

main tere waste badla to bahut hun lekin

kuchh kami rah gai hogi tere qabil na hua

nind us ne hi basai thi meri aankhon mein

jo mere KHwab ki ta'bir mein shamil na hua

kis mohabbat pe karoge ye safar KHatm agar

muntazir koi tumhaara sar-e-manzil na hua

aaina dekhte ye soch ke Dar jata hun

main kisi roz agar apne muqabil na hua

jism karta hi chala jaega be-sud tawaf

dil agar ka'ba-e-'ushshaq mein daKHil na hua

ab to ek aas pe tum tair rahe ho 'asim'

kya karoge agar us par bhi sahil na hua