maine ek harf se aage kabhi socha hi na tha

maiñ ne ik harf se aage kabhī sochā hī na thā

aur vo harf luġhat meñ tirī likkhā hī na thā

maiñ ne kahnā bhī jo chāhā to bayāñ kar na sakī

mujh meñ lafzoñ ko baratne kā salīqa hī na thā

us ne milne kī rah-o-rasm na kī tark magar

maiñ hī chup rah ga.ī ab ke vo akelā hī na thā

maiñ to shā'ir mirī sachchā.ī dalīleñ māñge

us ko kyā ho gayā vo jhūTh to bolā hī na thā

maiñ ne ik buuñd jo māñgī to 'ajab qaht paḌā

ḳhuun bāzāroñ meñ jaise kabhī biktā hī na thā

vo kaḌī dhuup hai sailāb-zadoñ ke sar par

aisā lagtā hai yahāñ abr to uThThā hī na thā

itne din baa'd jo ā.īna uThāyā maiñ ne

itnā dekhā mirā chehra mirā apnā hī na thā

main ne ek harf se aage kabhi socha hi na tha

aur wo harf lughat mein teri likkha hi na tha

main ne kahna bhi jo chaha to bayan kar na saki

mujh mein lafzon ko baratne ka saliqa hi na tha

us ne milne ki rah-o-rasm na ki tark magar

main hi chup rah gai ab ke wo akela hi na tha

main to sha'ir meri sachchai dalilen mange

us ko kya ho gaya wo jhuTh to bola hi na tha

main ne ek bund jo mangi to 'ajab qaht paDa

KHun bazaron mein jaise kabhi bikta hi na tha

wo kaDi dhup hai sailab-zadon ke sar par

aisa lagta hai yahan abr to uThTha hi na tha

itne din ba'd jo aaina uThaya main ne

itna dekha mera chehra mera apna hi na tha