maine irada jab bhi kiya hai uDan ka

maiñ ne irāda jab bhī kiyā hai uḌaan kā

us ko ḳhayāl aayā hai tīr-o-kamān kā

aa.e ḳhayāl apnī zamīñ kā bhī kuchh unheñ

rakhte haiñ dard dil meñ jo saare jahān kā

phir shahr-e-dostāñ kī taraf gāmzan huuñ maiñ

go jāntā huuñ shahr meñ ḳhatra hai jaan kā

ham ko zamīñ se ḳhūb-tar aayā na kuchh nazar

chakkar lagā ke dekh chuke āsmān kā

az-ḳhud hī ḳhvāhisheñ mirī mahdūd ho ga.iiñ

aayā ḳhayāl jab mujhe apne makān kā

main ne irada jab bhi kiya hai uDan ka

us ko KHayal aaya hai tir-o-kaman ka

aae KHayal apni zamin ka bhi kuchh unhen

rakhte hain dard dil mein jo sare jahan ka

phir shahr-e-dostan ki taraf gamzan hun main

go jaanta hun shahr mein KHatra hai jaan ka

hum ko zamin se KHub-tar aaya na kuchh nazar

chakkar laga ke dekh chuke aasman ka

az-KHud hi KHwahishen meri mahdud ho gain

aaya KHayal jab mujhe apne makan ka