main reza reza bikhar ke aise simaT raha hun

maiñ reza reza bikhar ke aise simaT rahā huuñ

ki thoḌā thoḌā sabhī ke hisse meñ baT rahā huuñ

maiñ ek patthar-sifat zamāne se huuñ magar ab

kisī ke aañsū ke chand qatroñ se kaT rahā huuñ

maiñ ḳhush huuñ us ko dikhā rahā huuñ na.e manāzir

magar ye dukh bhī ki us kī nazroñ se haT rahā huuñ

mujhe yaqīñ hai bichhaḌne vaalā yahīñ milegā

maiñ apne maazī ke aaj panne palaT rahā huuñ

tire badan se ġhazal kī ḳhushbū sī aa rahī hai

so tere dāman se kuchh ziyāda lipaT rahā huuñ

ajiib hai vo kisī kī bāhoñ meñ ḳhush bahut hai

ajiib huuñ maiñ jo naam us kā hī raT rahā huuñ

banāne vaale mujhe qad-āvar banā rahe haiñ

maiñ huuñ ki 'sājid' jo apne qad se bhī ghaT rahā huuñ

main reza reza bikhar ke aise simaT raha hun

ki thoDa thoDa sabhi ke hisse mein baT raha hun

main ek patthar-sifat zamane se hun magar ab

kisi ke aansu ke chand qatron se kaT raha hun

main KHush hun us ko dikha raha hun nae manazir

magar ye dukh bhi ki us ki nazron se haT raha hun

mujhe yaqin hai bichhaDne wala yahin milega

main apne mazi ke aaj panne palaT raha hun

tere badan se ghazal ki KHushbu si aa rahi hai

so tere daman se kuchh ziyaada lipaT raha hun

ajib hai wo kisi ki bahon mein KHush bahut hai

ajib hun main jo nam us ka hi raT raha hun

banane wale mujhe qad-awar bana rahe hain

main hun ki 'sajid' jo apne qad se bhi ghaT raha hun