main shakl dekh ke kaise kahun ki kya hoga

maiñ shakl dekh ke kaise kahūñ ki kyā hogā

hasīn shaḳhs hai mumkin hai bevafā hogā

tumheñ ḳhayāl bhī aayā safar pe jaate hue

tumhāre ba.ad hamārā yahāñ pe kyā hogā

maiñ jhuuT bol ke aayā thā vāpsī kā jise

vo shaḳhs ab bhī mirī raah dekhtā hogā

ye dostī na kahīñ pyaar meñ badal jaa.e

ab apne darmiyāñ thoḌā sā fāsla hogā

ye raaz mujh pe khulā ab ki merā koī nahīñ

maiñ sochtā thā mire saath bhī ḳhudā hogā

ye shā.irī kā to ḳhud shauq thā use 'jāñbāz'

haañ shā.iroñ se koī mas.ala rahā hogā

main shakl dekh ke kaise kahun ki kya hoga

hasin shaKHs hai mumkin hai bewafa hoga

tumhein KHayal bhi aaya safar pe jate hue

tumhaare baad hamara yahan pe kya hoga

main jhuT bol ke aaya tha wapsi ka jise

wo shaKHs ab bhi meri rah dekhta hoga

ye dosti na kahin pyar mein badal jae

ab apne darmiyan thoDa sa fasla hoga

ye raaz mujh pe khula ab ki mera koi nahin

main sochta tha mere sath bhi KHuda hoga

ye shairi ka to KHud shauq tha use 'jaanbaz'

han shairon se koi masala raha hoga