main tere waste laDte hue mara jata

maiñ tire vāste laḌte hue maarā jaatā

ishq vāloñ meñ mohabbat se pukārā jaatā

sang se shīsha banāte haiñ banāne vaale

koī hotā to mire dil ko sudhārā jaatā

yaar logoñ ne bichhaḌne meñ bahut jaldī kī

saath chalte to muqaddar bhī sañvārā jaatā

maiñ mohabbat ke qabīle kā payambar hotā

tū sahīfe kī tarah mujh pe utārā jaatā

terī āñkhoñ se koī nazm tarāshī jaatī

tere hoñToñ se koī sher ubhārā jaatā

chāhtā maiñ to use chhoḌ ke jā saktā thā

gaañv miT jaatā jo dariyā kā kināra jaatā

ab koī aur vasīla mire jiine ke liye

ab tirā hijr nahīñ mujh se guzārā jaatā

main tere waste laDte hue mara jata

ishq walon mein mohabbat se pukara jata

sang se shisha banate hain banane wale

koi hota to mere dil ko sudhaara jata

yar logon ne bichhaDne mein bahut jaldi ki

sath chalte to muqaddar bhi sanwara jata

main mohabbat ke qabile ka payambar hota

tu sahife ki tarah mujh pe utara jata

teri aankhon se koi nazm tarashi jati

tere honTon se koi sher ubhaara jata

chahta main to use chhoD ke ja sakta tha

ganw miT jata jo dariya ka kinara jata

ab koi aur wasila mere jine ke liye

ab tera hijr nahin mujh se guzara jata