main tumko pujta raha jab tak KHudi mein tha

maiñ tum ko pūjtā rahā jab tak ḳhudī meñ thā

apnā milā surāġh mujhe be-ḳhudī ke ba.ad

kyā rasm-e-ehtiyāt bhī duniyā se uTh ga.ī

ye sochnā paḌā mujhe terī hañsī ke ba.ad

ghabrā ke mar na jā.iye marne se fā.eda

ik aur zindagī bhī hai is zindagī ke ba.ad

aa.e haiñ is jahāñ meñ to jaanā zarūr hai

koī kisī se pahle to koī kisī ke ba.ad

ai abr-e-nau-bahār Thahar pī rahā huuñ maiñ

jaanā baras ke ḳhuub mirī mai-kashī ke ba.ad

marte the jis pe ham vo faqat husn hī na thā

ye raaz ham pe aaj khulā āshiqī ke ba.ad

ai mausam-e-bahār Thahar aa rahā huuñ maiñ

dāmān-e-chāk-chāk kī baḳhiya-garī ke ba.ad

main tum ko pujta raha jab tak KHudi mein tha

apna mila suragh mujhe be-KHudi ke baad

kya rasm-e-ehtiyat bhi duniya se uTh gai

ye sochna paDa mujhe teri hansi ke baad

ghabra ke mar na jaiye marne se faeda

ek aur zindagi bhi hai is zindagi ke baad

aae hain is jahan mein to jaana zarur hai

koi kisi se pahle to koi kisi ke baad

ai abr-e-nau-bahaar Thahar pi raha hun main

jaana baras ke KHub meri mai-kashi ke baad

marte the jis pe hum wo faqat husn hi na tha

ye raaz hum pe aaj khula aashiqi ke baad

ai mausam-e-bahaar Thahar aa raha hun main

daman-e-chaak-chaak ki baKHiya-gari ke baad