main uski na-muradi ko gham-e-hasil samajhta hun

maiñ us kī nā-murādī ko ġham-e-hāsil samajhtā huuñ

jise manzil nahīñ miltī use manzil samajhtā huuñ

maiñ apnī baat se phirtā nahīñ ḳhanjar ke phirne tak

jise qātil samajhtā huuñ use qātil samajhtā huuñ

tamāñche ek do merī taraf se bhī mire muñh par

ki ḳhud ko aaj kal maiñ bhī isī qābil samajhtā huuñ

tum aa.e ho magar mujh par girānī kā ye 'ālam hai

tumhāre haath ko siine pe rakkhī sil samajhtā huuñ

mujhe ummīd hai paanī mire ghar tak na aa.egā

shigāfoñ par rakhe hāthoñ ko maiñ sāhil samajhtā huuñ

agarche ye asar-andāz hotī hai mire ghar par

magar maiñ is udāsī ko ġhizā-e-dil samajhtā huuñ

to kyā ai shaḳhs terī justujū se thak chukā huuñ maiñ

ki tū hāsil nahīñ lekin tujhe hāsil samajhtā huuñ

main us ki na-muradi ko gham-e-hasil samajhta hun

jise manzil nahin milti use manzil samajhta hun

main apni baat se phirta nahin KHanjar ke phirne tak

jise qatil samajhta hun use qatil samajhta hun

tamanche ek do meri taraf se bhi mere munh par

ki KHud ko aaj kal main bhi isi qabil samajhta hun

tum aae ho magar mujh par girani ka ye 'alam hai

tumhaare hath ko sine pe rakkhi sil samajhta hun

mujhe ummid hai pani mere ghar tak na aaega

shigafon par rakhe hathon ko main sahil samajhta hun

agarche ye asar-andaz hoti hai mere ghar par

magar main is udasi ko ghiza-e-dil samajhta hun

to kya ai shaKHs teri justuju se thak chuka hun main

ki tu hasil nahin lekin tujhe hasil samajhta hun