main zindagi ke manazir pe dhyan deta hua

maiñ zindagī ke manāzir pe dhyān detā huā

har ik ghaḌī huuñ nayā imtihān detā huā

'ajīb qarya-e-mahkūm hai ki jis se maiñ

guzar rahā huuñ musalsal lagān detā huā

miyān-e-kūcha-e-be-saut se nikaltā huuñ

hujūm-e-gung ko apnī zabān detā huā

abhī to agle samay dekhnā hai qātil ko

gavāh bantā huā aur bayān detā huā

kisī hathelī pe rakkhā ho vo charāġh jo hai

sukūt-e-gumbad-e-shab meñ azaan detā huā

sahar kī khoj meñ niklā hai phir lahū apnā

har ek reza-e-dil ko uḌaan detā huā

yahīñ se guzregā 'at.har' lahū-libās koī

har ek naqsh-e-qadam se nishān detā huā

main zindagi ke manazir pe dhyan deta hua

har ek ghaDi hun naya imtihan deta hua

'ajib qarya-e-mahkum hai ki jis se main

guzar raha hun musalsal lagan deta hua

miyan-e-kucha-e-be-saut se nikalta hun

hujum-e-gung ko apni zaban deta hua

abhi to agle samay dekhna hai qatil ko

gawah banta hua aur bayan deta hua

kisi hatheli pe rakkha ho wo charagh jo hai

sukut-e-gumbad-e-shab mein azan deta hua

sahar ki khoj mein nikla hai phir lahu apna

har ek reza-e-dil ko uDan deta hua

yahin se guzrega 'athar' lahu-libas koi

har ek naqsh-e-qadam se nishan deta hua