makan apna main Dhae ja raha hun

makāñ apnā maiñ Dhaa.e jā rahā huuñ

koī rasta banā.e jā rahā huuñ

ġhazab thā zā.iqa apne lahū kā

musalsal ḳhud ko khaa.e jā rahā huuñ

udhar hamvār kartā hai vo mujh ko

idhar dīvār uThā.e jā rahā huuñ

tum apnī daf bajā.e jā rahe ho

maiñ apnā giit gaa.e jā rahā huuñ

na aanā ho mirī rah se kisī kā

so apne naqsh uThā.e jā rahā huuñ

kise ho dhuup kī ab fikr 'sānī'

maiñ apne sā.e-sā.e jā rahā huuñ

makan apna main Dhae ja raha hun

koi rasta banae ja raha hun

ghazab tha zaiqa apne lahu ka

musalsal KHud ko khae ja raha hun

udhar hamwar karta hai wo mujh ko

idhar diwar uThae ja raha hun

tum apni daf bajae ja rahe ho

main apna git gae ja raha hun

na aana ho meri rah se kisi ka

so apne naqsh uThae ja raha hun

kise ho dhup ki ab fikr 'sani'

main apne sae-sae ja raha hun