maKHmur ada-e-saqi hai mahrum dil-e-nakaam nahin

maḳhmūr adā-e-sāqī hai mahrūm dil-e-nākām nahīñ

khīñch aa.ī hai mere sāġhar meñ vo mai jo rahīn-e-jām nahīñ

duniyā-e-chaman hai pesh-e-nazar phirtā hai samāñ āñkhoñ meñ vahī

ham laakh raheñ pāband-e-qafas kuchh dil to asīr-e-dām nahīñ

kyoñ daaġh lahū ke dhote ho kyoñ zīnat-e-dāman khote ho

be-kār pareshāñ hote ho tum par to koī ilzām nahīñ

vo mahv-e-taġhāful suntā hai ham kahte haiñ dil kā afsāna

kuchh bāteñ haiñ bahkī bahkī sī āġhāz nahīñ anjām nahīñ

yā ham hī nahīñ shāyān-e-jafā yā us ko nahīñ hai qadr-e-vafā

is bazm meñ 'kaifī' varna koī mahrūm nahīñ nākām nahīñ

maKHmur ada-e-saqi hai mahrum dil-e-nakaam nahin

khinch aai hai mere saghar mein wo mai jo rahin-e-jam nahin

duniya-e-chaman hai pesh-e-nazar phirta hai saman aankhon mein wahi

hum lakh rahen paband-e-qafas kuchh dil to asir-e-dam nahin

kyon dagh lahu ke dhote ho kyon zinat-e-daman khote ho

be-kar pareshan hote ho tum par to koi ilzam nahin

wo mahw-e-taghaful sunta hai hum kahte hain dil ka afsana

kuchh baaten hain bahki bahki si aaghaz nahin anjam nahin

ya hum hi nahin shayan-e-jafa ya us ko nahin hai qadr-e-wafa

is bazm mein 'kaifi' warna koi mahrum nahin nakaam nahin