manzar hayat-sozi ka dekha na jaega

manzar hayāt-sozī kā dekhā na jā.egā

ham se to ghar meñ chain se baiThā na jā.egā

kaT jaa.e sar balā se jhukāyā na jā.egā

zālim ko be-gunāh to likkhā na jā.egā

tūfān sar uThā.e ki bijlī koī gire

gul kī hañsī kalī kā chaTaknā na jā.egā

maqtal sajāo tum ki salībeñ khaḌī karo

ye inqilāb-e-vaqt hai rokā na jā.egā

achchhā huā ki fikr-e-nasheman se bach ga.e

ehsān bijliyoñ kā bhulāyā na jā.egā

ab be-qarāriyoñ hī se shāyad sukūñ mile

āsūdgī meñ dil kā taḌapnā na jā.egā

dil kī jahāñ hai qadr na qīmat zamīr kī

us anjuman meñ ham se to jaayā na jā.egā

karnā hai tishnagī kā mudāvā hameñ 'azīz'

chal kar kisī ke paas to dariyā na jā.egā

manzar hayat-sozi ka dekha na jaega

hum se to ghar mein chain se baiTha na jaega

kaT jae sar bala se jhukaya na jaega

zalim ko be-gunah to likkha na jaega

tufan sar uThae ki bijli koi gire

gul ki hansi kali ka chaTakna na jaega

maqtal sajao tum ki saliben khaDi karo

ye inqilab-e-waqt hai roka na jaega

achchha hua ki fikr-e-nasheman se bach gae

ehsan bijliyon ka bhulaya na jaega

ab be-qarariyon hi se shayad sukun mile

aasudgi mein dil ka taDapna na jaega

dil ki jahan hai qadr na qimat zamir ki

us anjuman mein hum se to jaya na jaega

karna hai tishnagi ka mudawa hamein 'aziz'

chal kar kisi ke pas to dariya na jaega