منظر مری نظر نے سنوارا زمین پر

منظر مری نظر نے سنوارا زمین پر

ذرہ بنا دیا ہے ستارہ زمین پر

گزرا ہے آسماں کی طرف دیکھتے ہوئے

جتنا بھی وقت ہم نے گزارا زمین پر

تو ہے فلک شناس ذرا دیکھ کر بتا

کب ٹوٹ کر گرے گا ستارہ زمین پر

کیسے خلا نے ہم کو اچھالا ہے اس طرف

کیا آسمان کا ہے کنارہ زمین پر

اے دوست ڈھونڈھ یار کوئی آسمان میں

یاری کا ہے نہیں تجھے یارا زمین پر

رد کی ہے تیرگی تو پھر اپنا بھی آپنے

سایہ نہیں کیا ہے گوارہ زمین پر

عاصمؔ اجل تھی روز ازل ہی سے تاک میں

لا کر فلک کا آدمی مارا زمین پر