manzil-e-shab se guzar kar subh tak aate hain log

manzil-e-shab se guzar kar sub.h tak aate haiñ log

raushnī ban kar añdheroñ meñ utar jaate haiñ log

‘ālam-e-pīrī meñ aatā hai salīqa ziist kā

jāgne kā vaqt aatā hai to so jaate haiñ log

e'tibār-e-vā’da-e-fardā umīd-e-vasl-e-yār

kyā khilaune haiñ ki jin se ḳhud ko bahlāte haiñ log

sirf qurbat hī nahīñ shart-e-rifāqat dosto

sāmne rah kar bhī aksar duur ho jaate haiñ log

ham ne dekhā hai ki aksar maslahat kī raah meñ

apnī hī dānā.ī kī suulī pe chaḌh jaate haiñ log

jis diye ko kal havā kī zad pe rakkhā thā 'sirāj'

us diye hī se ujāle māñgne aate haiñ log

manzil-e-shab se guzar kar subh tak aate hain log

raushni ban kar andheron mein utar jate hain log

‘alam-e-piri mein aata hai saliqa zist ka

jagne ka waqt aata hai to so jate hain log

e'tibar-e-wa’da-e-farda umid-e-wasl-e-yar

kya khilaune hain ki jin se KHud ko bahlate hain log

sirf qurbat hi nahin shart-e-rifaqat dosto

samne rah kar bhi aksar dur ho jate hain log

hum ne dekha hai ki aksar maslahat ki rah mein

apni hi danai ki suli pe chaDh jate hain log

jis diye ko kal hawa ki zad pe rakkha tha 'siraj'

us diye hi se ujale mangne aate hain log