منزل شب سے گزر کر صبح تک آتے ہیں لوگ

منزل شب سے گزر کر صبح تک آتے ہیں لوگ

روشنی بن کر اندھیروں میں اتر جاتے ہیں لوگ

عالم پیری میں آتا ہے سلیقہ زیست کا

جاگنے کا وقت آتا ہے تو سو جاتے ہیں لوگ

اعتبار وعدۂ فردا امید وصل یار

کیا کھلونے ہیں کہ جن سے خود کو بہلاتے ہیں لوگ

صرف قربت ہی نہیں شرط رفاقت دوستو

سامنے رہ کر بھی اکثر دور ہو جاتے ہیں لوگ

ہم نے دیکھا ہے کہ اکثر مصلحت کی راہ میں

اپنی ہی دانائی کی سولی پہ چڑھ جاتے ہیں لوگ

جس دیے کو کل ہوا کی زد پہ رکھا تھا سراجؔ

اس دیے ہی سے اجالے مانگنے آتے ہیں لوگ