maqtal se mera kasa-e-sar kaun le gaya

maqtal se merā kāsa-e-sar kaun le gayā

us tak ye dil-ḳharāsh ḳhabar kaun le gayā

chehre pe gard-e-rāh bhī baaqī nahīñ rahī

mujh se mirā subūt-e-safar kaun le gayā

raas aa chalī thī dil kī fazā-e-junūn-e-shauq

bahkā ke mujh ko dasht se ghar kaun le gayā

be-laus dostī ke zamāne kahāñ ga.e

sarmāya-e-ḳhulūs-e-bashar kaun le gayā

ye dekhne kī koī zarūrat nahīñ rahī

kis kā hunar thā dād-e-hunar kaun le gayā

ghar se nikal paḌe haiñ to ab kyā ye dekhnā

raste se sāya-dār shajar kaun le gayā

dariyā vahī hai us kī ravānī vahī magar

rū-posh thā jo tah meñ guhar kaun le gayā

a.amāl apne dekh ke ye tajziya bhī kar

'nāzir' tirī duā se asar kaun le gayā

maqtal se mera kasa-e-sar kaun le gaya

us tak ye dil-KHarash KHabar kaun le gaya

chehre pe gard-e-rah bhi baqi nahin rahi

mujh se mera subut-e-safar kaun le gaya

ras aa chali thi dil ki faza-e-junun-e-shauq

bahka ke mujh ko dasht se ghar kaun le gaya

be-laus dosti ke zamane kahan gae

sarmaya-e-KHulus-e-bashar kaun le gaya

ye dekhne ki koi zarurat nahin rahi

kis ka hunar tha dad-e-hunar kaun le gaya

ghar se nikal paDe hain to ab kya ye dekhna

raste se saya-dar shajar kaun le gaya

dariya wahi hai us ki rawani wahi magar

ru-posh tha jo tah mein guhar kaun le gaya

aamal apne dekh ke ye tajziya bhi kar

'nazir' teri dua se asar kaun le gaya