mar kar are waiz koi zinda nahin hota

mar kar are vaa.iz koī zinda nahīñ hotā

vo hashr maze kā hai jo barpā nahīñ hotā

but toḌne se but-kada ka.aba nahīñ hotā

pahle kabhī hotā ho ab aisā nahīñ hotā

sab hashr meñ haiñ aaj hamīñ zer-e-lahad haiñ

kyā jāniye kyuuñ hashr hamārā nahīñ hotā

hotī hai jo shīshe meñ to hotī nahīñ kuchh fikr

thoḌī sī bhī ho to ġham-e-fardā nahīñ hotā

Thukrāte nahīñ pā-e-hinā.ī se vo sar ko

raushan kabhī qismat kā sitārā nahīñ hotā

sun lete haiñ chupke se mo.azzin kī ham ai shaiḳh

jab haath meñ nāqūs-e-kalīsā nahīñ hotā

aane ko to aatī haiñ junūñ-ḳhez bahāreñ

kyā jāniye ab kyuuñ hameñ saudā nahīñ hotā

maiḳhāne meñ kyuuñ yād-e-ḳhudā hotī hai aksar

masjid meñ to zikr-e-mai-o-mīnā nahīñ hotā

allāh dikhā.e na burā vaqt kisī ko

koī bhī zamāne meñ kisī kā nahīñ hotā

Thukrāte hue Darte ho kyuuñ merī lahad ko

Thokar se tumhārī koī zinda nahīñ hotā

aaqā se 'riyāz' aap to kahte nahīñ kuchh bhī

auroñ se gila kaam hamārā nahīñ hotā

mar kar are waiz koi zinda nahin hota

wo hashr maze ka hai jo barpa nahin hota

but toDne se but-kada kaba nahin hota

pahle kabhi hota ho ab aisa nahin hota

sab hashr mein hain aaj hamin zer-e-lahad hain

kya jaaniye kyun hashr hamara nahin hota

hoti hai jo shishe mein to hoti nahin kuchh fikr

thoDi si bhi ho to gham-e-farda nahin hota

Thukraate nahin pa-e-hinai se wo sar ko

raushan kabhi qismat ka sitara nahin hota

sun lete hain chupke se moazzin ki hum ai shaiKH

jab hath mein naqus-e-kalisa nahin hota

aane ko to aati hain junun-KHez bahaaren

kya jaaniye ab kyun hamein sauda nahin hota

maiKHane mein kyun yaad-e-KHuda hoti hai aksar

masjid mein to zikr-e-mai-o-mina nahin hota

allah dikhae na bura waqt kisi ko

koi bhi zamane mein kisi ka nahin hota

Thukraate hue Darte ho kyun meri lahad ko

Thokar se tumhaari koi zinda nahin hota

aaqa se 'riyaz' aap to kahte nahin kuchh bhi

auron se gila kaam hamara nahin hota