mari wafa ne khilae the jo gulab sare jhulas gae hain

marī vafā ne khilā.e the jo gulāb saare jhulas ga.e haiñ

tumhārī āñkhoñ meñ jis qadar the vo ḳhvāb saare jhulas ga.e haiñ

marī zamīñ ko kisī na.e hādse kā hai intizār shāyad

gunāh phalne lage haiñ ajr o savāb saare jhulas ga.e haiñ

jo tum ga.e to mirī nazar pe haqīqatoñ ke azaab utre

ye sochtā huuñ ki kyā karūñgā sarāb saare jhulas ga.e haiñ

ye mo.ajiza sirf ek shab kī masāfatoñ ke sabab huā hai

tumhāre aur mere darmiyāñ ke hijāb saare jhulas ga.e haiñ

use batānā ki us kī yādoñ ke saare safhe jalā chukā huuñ

kitāb-e-dil meñ raqam the jitne vo baab saare jhulas ga.e haiñ

nazar uThā.ūñ maiñ jis taraf bhī muhīb saa.e haiñ zulmatoñ ke

ye kyā ki mere nasīb ke māhtāb saare jhulas ga.e haiñ

tumhārī nazroñ kī ye tapish hai ki mere lafzoñ pe aable haiñ

savāl saare jhulas ga.e haiñ javāb saare jhulas ga.e haiñ

ye aag ḳhāmoshiyoñ kī kaisī tumhārī āñkhoñ meñ tairtī hai

tumhāre hoñToñ pe darj the jo nisāb saare jhulas ga.e haiñ

mari wafa ne khilae the jo gulab sare jhulas gae hain

tumhaari aankhon mein jis qadar the wo KHwab sare jhulas gae hain

mari zamin ko kisi nae hadse ka hai intizar shayad

gunah phalne lage hain ajr o sawab sare jhulas gae hain

jo tum gae to meri nazar pe haqiqaton ke azab utre

ye sochta hun ki kya karunga sarab sare jhulas gae hain

ye moajiza sirf ek shab ki masafaton ke sabab hua hai

tumhaare aur mere darmiyan ke hijab sare jhulas gae hain

use batana ki us ki yaadon ke sare safhe jala chuka hun

kitab-e-dil mein raqam the jitne wo bab sare jhulas gae hain

nazar uThaun main jis taraf bhi muhib sae hain zulmaton ke

ye kya ki mere nasib ke mahtab sare jhulas gae hain

tumhaari nazron ki ye tapish hai ki mere lafzon pe aable hain

sawal sare jhulas gae hain jawab sare jhulas gae hain

ye aag KHamoshiyon ki kaisi tumhaari aankhon mein tairti hai

tumhaare honTon pe darj the jo nisab sare jhulas gae hain