مسافتوں کے وسیلے نہیں بدل جاتے

مسافتوں کے وسیلے نہیں بدل جاتے

ہوا بدلنے سے رستے نہیں بدل جاتے

لہو کی آگ سے روشن ہیں پیار کی قدریں

کہیں بھی جاؤ یہ رشتے نہیں بدل جاتے

میں معترف ہوں یزیدوں کا شہر ہے یہ بھی

مگر فرات کے پیاسے نہیں بدل جاتے

ہر اک مقام پہ پاکیزگی سلامت ہے

زمیں پہ آ کے فرشتے نہیں بدل جاتے

گھروں میں بیٹھ کے پیغمبری نہیں ہوتی

گھروں میں بیٹھ کے بچے نہیں بدل جاتے

کسی بھی حال سے گزریں مگر کبھی راہیؔ

بزرگ لوگوں کے رتبے نہیں بدل جاتے