maslak-e-ishq mein jaez hai jafa rahne de

maslak-e-ishq meñ jaa.ez hai jafā rahne de

mujh ko mahbūb kī chaukhaT pe paḌā rahne de

ālam-e-naza.a meñ saaya ho ghanī zulfoñ kā

apne chehra pe nigāhoñ ko jamā rahne de

ham ne kāñToñ se nikālā hai adab ko zālim

halqa-e-zauq ko phūloñ se sajā rahne de

terī nazroñ se chalā tiir lagā hai dil par

is bahāne hī sahī phuul khilā rahne de

naam lenā bhī hai dūbhar ye vafā kaisī hai

shaaq hai dil pe bahut aisī sazā rahne de

mere zaḳhmoñ kā mudāvā hai duā.eñ terī

kam se kam naam hī hoñToñ pe sajā rahne de

terī muskān meñ pinhāñ hai hamārī hastī

apne hoñToñ pe tabassum ko zarā rahne de

aks āñkhoñ meñ basāne kī ijāzat de de

apnī yādoñ kā diyā dil meñ jalā rahne de

dosh-e-makkār uThā.e jo janāza merā

is se behtar hai ki maqtal meñ paḌā rahne de

mashrab-e-dīd kā shaidā.ī 'falak kahtā hai

jām-e-ulfat meñ tamannā ko milā rahne de

maslak-e-ishq mein jaez hai jafa rahne de

mujh ko mahbub ki chaukhaT pe paDa rahne de

aalam-e-naza mein saya ho ghani zulfon ka

apne chehra pe nigahon ko jama rahne de

hum ne kanTon se nikala hai adab ko zalim

halqa-e-zauq ko phulon se saja rahne de

teri nazron se chala tir laga hai dil par

is bahane hi sahi phul khila rahne de

nam lena bhi hai dubhar ye wafa kaisi hai

shaq hai dil pe bahut aisi saza rahne de

mere zaKHmon ka mudawa hai duaen teri

kam se kam nam hi honTon pe saja rahne de

teri muskan mein pinhan hai hamari hasti

apne honTon pe tabassum ko zara rahne de

aks aankhon mein basane ki ijazat de de

apni yaadon ka diya dil mein jala rahne de

dosh-e-makkar uThae jo janaza mera

is se behtar hai ki maqtal mein paDa rahne de

mashrab-e-did ka shaidai 'falak kahta hai

jam-e-ulfat mein tamanna ko mila rahne de