مصروف ہوئے اتنے اس عالم فانی میں

مصروف ہوئے اتنے اس عالم فانی میں

ہم ہی نہ نظر آئے خود اپنی کہانی میں

گلشن کے نگہبانو ہم کو نہ بھلا دینا

کچھ خار بھی لازم ہیں پھولوں کی کہانی میں

اے دیدۂ تر تجھ کو معلوم نہیں شاید

بہ جاتے ہیں خواب اکثر اشکوں کی روانی میں

اب وہ بھی کسی گھر کی دیوار کا حصہ ہیں

بنیاد کے پتھر جو باقی تھے نشانی میں

کچھ ذہن میں ہوتا ہے آتا ہے زباں پر کچھ

کہہ جاتے ہیں جانے کیا ہم یوں ہی روانی میں

کب رات گزرتی ہے کب دن نکل آتا ہے

کچھ ہوش نہیں رہتا ذیشانؔ جوانی میں