mata-e-husn-e-‘aish-e-jawedan malum hoti hai

matā'-e-husn-e-‘aish-e-jāvedāñ mā'lūm hotī hai

tirī raunaq bahār-e-be-ḳhizāñ mā'lūm hotī hai

zabān-e-'ishq chup hai rāz-e-ulfat āshkārā hai

ḳhamoshī tarjumān-e-be-zabāñ mā'lūm hotī hai

ġham-e-duniyā-o-dīñ se dil ko is ne kar diyā fāriġh

tirī ulfat anīs-e-be-kasāñ mā'lūm hotī hai

ḳhushī ke chand din the jo ḳhushī meñ kaT ga.e lekin

hayāt-e-ġham hayāt-e-jāvedāñ mā'lūm hotī hai

kabhī jo aarzū naqsh-o-nigār-e-lauha-e-dil thī

vahī siine pe ab sang-e-girāñ mā'lūm hotī hai

abhī hai duur sarhad lazzat-e-dard-e-nihānī kī

abhī to lazzat-e-dard-e-nihāñ mā'lūm hotī hai

bhare aate haiñ aañsū sun ke hāl-e-girya-e-bulbul

are dil ye to apnī dāstāñ mā'lūm hotī hai

hujūm-e-ġham kī dil par āj-kal aisī kashākash hai

matā'-e-zindagī bār-e-garāñ mā'lūm hotī hai

ye Dar hai rāz-e-dil ifshā na ho jaa.e kahīñ yā-rab

nigāh-e-yār ab kuchh mehrbāñ mā'lūm hotī hai

ḳhudā mā'lūm kitne aur kaise ġham uThā.e haiñ

hañsī bhī dard-mandoñ kī fuġhāñ mā'lūm hotī hai

kiyā inkār bhī us ne to ummīdeñ baḌhīñ dil kī

ye us kī shoḳhī-e-husn-e-bayāñ mā'lūm hotī hai

zabāñ par hāl-e-dil aa.e 'jalīl' is kī zarūrat kyā

mirī hastī mujassam dāstāñ mā'lūm hotī hai

mata'-e-husn-e-‘aish-e-jawedan ma'lum hoti hai

teri raunaq bahaar-e-be-KHizan ma'lum hoti hai

zaban-e-'ishq chup hai raaz-e-ulfat aashkara hai

KHamoshi tarjuman-e-be-zaban ma'lum hoti hai

gham-e-duniya-o-din se dil ko is ne kar diya farigh

teri ulfat anis-e-be-kasan ma'lum hoti hai

KHushi ke chand din the jo KHushi mein kaT gae lekin

hayat-e-gham hayat-e-jawedan ma'lum hoti hai

kabhi jo aarzu naqsh-o-nigar-e-lauha-e-dil thi

wahi sine pe ab sang-e-giran ma'lum hoti hai

abhi hai dur sarhad lazzat-e-dard-e-nihani ki

abhi to lazzat-e-dard-e-nihan ma'lum hoti hai

bhare aate hain aansu sun ke haal-e-girya-e-bulbul

are dil ye to apni dastan ma'lum hoti hai

hujum-e-gham ki dil par aaj-kal aisi kashakash hai

mata'-e-zindagi bar-e-garan ma'lum hoti hai

ye Dar hai raaz-e-dil ifsha na ho jae kahin ya-rab

nigah-e-yar ab kuchh mehrban ma'lum hoti hai

KHuda ma'lum kitne aur kaise gham uThae hain

hansi bhi dard-mandon ki fughan ma'lum hoti hai

kiya inkar bhi us ne to ummiden baDhin dil ki

ye us ki shoKHi-e-husn-e-bayan ma'lum hoti hai

zaban par haal-e-dil aae 'jalil' is ki zarurat kya

meri hasti mujassam dastan ma'lum hoti hai