mauj-e-anfas bhi ek tegh-e-rawan ho jaise

mauj-e-anfās bhī ik teġh-e-ravāñ ho jaise

zindagī kār-gah-e-shīsha-garāñ ho jaise

dil pe yuuñ aks-fagan hai koī bhūlī huī yaad

sar-e-kohsār dhundalke kā samāñ ho jaise

hāsil-e-umr-e-vafā hai bas ik ehsās-e-yaqīñ

vo bhī parvarda-e-āġhosh-e-gumāñ ho jaise

mujh se vo aañkh churātā hai to yuuñ lagtā hai

saarī duniyā mirī jānib nigarāñ ho jaise

aaj 'ash.ar' se sar-e-rāh mulāqāt huī

koī darmānda-e-dil sho.ala-ba-jāñ ho jaise

mauj-e-anfas bhi ek tegh-e-rawan ho jaise

zindagi kar-gah-e-shisha-garan ho jaise

dil pe yun aks-fagan hai koi bhuli hui yaad

sar-e-kohsar dhundalke ka saman ho jaise

hasil-e-umr-e-wafa hai bas ek ehsas-e-yaqin

wo bhi parwarda-e-aghosh-e-guman ho jaise

mujh se wo aankh churaata hai to yun lagta hai

sari duniya meri jaanib nigaran ho jaise

aaj 'ashar' se sar-e-rah mulaqat hui

koi darmanda-e-dil shoala-ba-jaan ho jaise