موج دریا کے لبوں پر تشنگی ہے کربلا

موج دریا کے لبوں پر تشنگی ہے کربلا

ریگ ساحل پر تڑپتی زندگی ہے کربلا

صبر کی اور ضبط کی یہ منزلیں ہیں آخری

عزم اہل بیت کا کیا دیکھتی ہے کربلا

حق کبھی جھکتا نہیں ہے سر بھی کٹ جائے اگر

ذہن و دل کے واسطے اک آگہی ہے کربلا

کیوں سکینہ اور زینب اس قدر خاموش ہیں

دور تک صحرا میں دیکھو خامشی ہے کربلا

مٹ گیا ہے فرق سب فردا میں اور دیروز میں

مات دے کر رخش دوراں کو چلی ہے کربلا

تا قیامت ذکر سے روشن رہے گی یہ زمیں

ظلمتوں کی شام میں اک روشنی ہے کربلا

اے غم شام غریباں اے شب تار الم

اہل دل کو روز و شب تڑپا رہی ہے کربلا