maujud the wo mere hi andar khule hue

maujūd the vo mere hī andar khule hue

mujh par duā ke baa'd khule dar khule hue

āñkhoñ ne kar diyā use ruḳhsat magar abhī

rakkhe hue haiñ dil ne sabhī dar khule hue

kuchh to khule ki guzrī hai kyā ahl-e-dasht par

aa.e haiñ log shahr meñ kyoñ sar khule hue

ik ḳhauf hai ki jis ne uḌaa.ī hai merī niiñd

dekhe haiñ maiñ ne ḳhvāb meñ ḳhanjar khule hue

mumkin hai phir saroñ ko uThā.eñ na faḳhr se

qabroñ ke dekh leñ jo kabhī sar khule hue

luTne meñ dard kyā hai kabhī un se pūchh leñ

chhoḌ aa.e the jo log 'yashab' ghar khule hue

maujud the wo mere hi andar khule hue

mujh par dua ke ba'd khule dar khule hue

aankhon ne kar diya use ruKHsat magar abhi

rakkhe hue hain dil ne sabhi dar khule hue

kuchh to khule ki guzri hai kya ahl-e-dasht par

aae hain log shahr mein kyon sar khule hue

ek KHauf hai ki jis ne uDai hai meri nind

dekhe hain main ne KHwab mein KHanjar khule hue

mumkin hai phir saron ko uThaen na faKHr se

qabron ke dekh len jo kabhi sar khule hue

luTne mein dard kya hai kabhi un se puchh len

chhoD aae the jo log 'yashab' ghar khule hue