mausam ko aazmana mahnga paDega tumko

mausam ko āzmānā mahñgā paḌegā tum ko

be-vaqt chhat pe aanā mahñgā paḌegā tum ko

yak-tarfa 'ishq be-shak haq hai tumhārā lekin

patthar se dil lagānā mahñgā paḌegā tum ko

ab sar-phirī havā.eñ patthar uchhāltī haiñ

shīshe kā ghar banānā mahñgā paḌegā tum ko

ahl-e-karam ne jaarī farmān ye kiyā hai

haq par qalam uThānā mahñgā paḌegā tum ko

ye zalzale ye tūfāñ ab bolne lage haiñ

qudrat ko āzmānā mahñgā paḌegā tum ko

mere paḌos hī meñ ghar hai tumhārā sāhib

merā makāñ jalānā mahñgā paḌegā tum ko

o 'ishq karne vaalo is tarh har kisī ke

dil ko kuchal ke jaanā mahñgā paḌegā tum ko

behtar yahī hai 'āqib' lo raah apne ghar kī

mausam ye 'āshiqāna mahñgā paḌegā tum ko

mausam ko aazmana mahnga paDega tum ko

be-waqt chhat pe aana mahnga paDega tum ko

yak-tarfa 'ishq be-shak haq hai tumhaara lekin

patthar se dil lagana mahnga paDega tum ko

ab sar-phiri hawaen patthar uchhaalti hain

shishe ka ghar banana mahnga paDega tum ko

ahl-e-karam ne jari farman ye kiya hai

haq par qalam uThana mahnga paDega tum ko

ye zalzale ye tufan ab bolne lage hain

qudrat ko aazmana mahnga paDega tum ko

mere paDos hi mein ghar hai tumhaara sahib

mera makan jalana mahnga paDega tum ko

o 'ishq karne walo is tarh har kisi ke

dil ko kuchal ke jaana mahnga paDega tum ko

behtar yahi hai 'aqib' lo rah apne ghar ki

mausam ye 'ashiqana mahnga paDega tum ko