موت آئے تو اس طرح آئے

موت آئے تو اس طرح آئے

زندگی کو خبر نہ ہو پائے

ہم نہ بدلیں گے راستہ اپنا

جان جاتی ہے گر چلی جائے

موت برحق ہے آئے گی لیکن

چارہ گر کون تجھ کو سمجھائے

سر سلامت جہاں نہیں رہتے

سر اٹھا کر وہاں سے ہم آئے

در پہ چھوڑ آئے ان کے روح اپنی

صرف ہم جسم کو اٹھا لائے

جب رہا ہی نہیں کوئی اپنا

کون غمگین دل کو بہلائے

اپنے ہی دل پہ اب نہیں قابو

خوش کبھی ہو کبھی یہ اکتائے

اپنی لکھی ہوئی غزل پڑھنا

دل جو ہانیؔ تمہارا گھبرائے