maut aai kitni bar nai zindagi hui

maut aa.ī kitnī baar na.ī zindagī huī

niklī magar na phāñs jigar meñ chhupī huī

ab ho bhī koī mā.il-e-lutf-o-karam to kyā

hotī nahīñ shagufta tabī.at bujhī huī

mausam yahī bahār kā hai ishq ke liye

aatī nahīñ palaT ke javānī ga.ī huī

kuchh zahr kā nasha hai to kuchh thartharī sī hai

rag rag meñ aaj hai koī shai pairtī huī

āb-e-hayāt bhī koī chhiḌke agar to kyā

bujhtī nahīñ hai aag jigar meñ lagī huī

aa.ī hai saañs dūsrī nashtar liye hue

ik saañs meñ hameñ jo masarrat kabhī huī

har roz ek dard nayā dil meñ hai 'jigar'

har raat sochte haiñ ki had dard kī huī

sahrā meñ chal ke ġham ko bhulā do uTho 'jigar'

dekho vo aa rahī hai ghaTā jhūmtī huī

maut aai kitni bar nai zindagi hui

nikli magar na phans jigar mein chhupi hui

ab ho bhi koi mail-e-lutf-o-karam to kya

hoti nahin shagufta tabiat bujhi hui

mausam yahi bahaar ka hai ishq ke liye

aati nahin palaT ke jawani gai hui

kuchh zahr ka nasha hai to kuchh tharthari si hai

rag rag mein aaj hai koi shai pairti hui

aab-e-hayat bhi koi chhiDke agar to kya

bujhti nahin hai aag jigar mein lagi hui

aai hai sans dusri nashtar liye hue

ek sans mein hamein jo masarrat kabhi hui

har roz ek dard naya dil mein hai 'jigar'

har raat sochte hain ki had dard ki hui

sahra mein chal ke gham ko bhula do uTho 'jigar'

dekho wo aa rahi hai ghaTa jhumti hui