maut aai mujhe kuche mein tere jaane se

maut aa.ī mujhe kūche meñ tire jaane se

niiñd aa hī ga.ī jannat kī havā khāne se

huuñ vo āshiq ki tah-e-qabr maiñ jal jaatā huuñ

sham.a turbat par agar miltī hai parvāne se

qasd uThne kā qayāmat ne kiyā to ye kahā

lo ye sar chaḌhne lagī paañv ke Thukrāne se

vasl kī shab na kar itnā bhī hijāb ai zālim

shoḳhiyāñ tañg haiñ terī tire sharmāne se

koī hañs hañs ke sune aur maiñ ro ro ke kahūñ

lutf donoñ ko mile dard ke afsāne se

ġhuncha chaTkā koī gulshan meñ to lailā samjhī

mere majnūñ ne pukārā mujhe vīrāne se

rahe rañj o alam o vahshat o barbādī o yaas

ai junūñ koī na jaa.e mire vīrāne se

kis ko fursat thī par is tarah meñ kuchh sher 'vasīm'

kah liye hazrat-e-'naushād' ke farmāne se

maut aai mujhe kuche mein tere jaane se

nind aa hi gai jannat ki hawa khane se

hun wo aashiq ki tah-e-qabr main jal jata hun

shama turbat par agar milti hai parwane se

qasd uThne ka qayamat ne kiya to ye kaha

lo ye sar chaDhne lagi panw ke Thukrane se

wasl ki shab na kar itna bhi hijab ai zalim

shoKHiyan tang hain teri tere sharmane se

koi hans hans ke sune aur main ro ro ke kahun

lutf donon ko mile dard ke afsane se

ghuncha chaTka koi gulshan mein to laila samjhi

mere majnun ne pukara mujhe virane se

rahe ranj o alam o wahshat o barbaadi o yas

ai junun koi na jae mere virane se

kis ko fursat thi par is tarah mein kuchh sher 'wasim'

kah liye hazrat-e-'naushad' ke farmane se