موت منزل اگر نہیں ہوتی

موت منزل اگر نہیں ہوتی

زندگی مختصر نہیں ہوتی

دل سے نکلی ہوئی دعا یا پھر

بد دعا بے اثر نہیں ہوتی

ہو ہی جاتی ہے جانے کیوں ان بن

بات کچھ بھی مگر نہیں ہوتی

لوگ اٹھتے ہیں دوپہر کے بعد

کچھ گھروں میں سحر نہیں ہوتی

خاک ہر روز ہو رہے ہیں ہم

اور بالکل خبر نہیں ہوتی

کیا کبھی عشق مشک چھپتے ہیں

ان پہ کس کی نظر نہیں ہوتی

یاد کرتا خدا کو کون یہاں

زندگی ہی اگر نہیں ہوتی

چھوڑ جائے گی تجھ کو اے حشمتؔ

جاں کبھی معتبر نہیں ہوتی