موت نے فرصت نکالی ہے ابھی

موت نے فرصت نکالی ہے ابھی

غم سے راحت ملنے والی ہے ابھی

جو دلائی تھی کتابیں بیچ کر

اس کے کانوں میں وہ بالی ہے ابھی

آؤ یارو تم بھی تھوڑا زور دو

عشق کی گردن دبا لی ہے ابھی

آ کے وہ زخموں سے دل بھر جائے گا

لاکھ بہتر ہے کہ خالی ہے ابھی

داغ بننے میں ابھی کچھ وقت ہے

میں نے جو امید پالی ہے ابھی

مل گیا اک شخص مجھ سا ہو بہ ہو

جسم کی خلوت کھنگالی ہے ابھی

کل وہ پھر کوئی بہانے آئے گی

چارہ سازی سے جو ٹالی ہے ابھی

جل رہے ہیں سوزش منظر سے پاؤں

گو سفرؔ سارا خیالی ہے ابھی