maza gunah ka jab tha ki ba-wazu karte

maza gunāh kā jab thā ki bā-vazū karte

butoñ ko sajda bhī karte to qibla-rū karte

kabhī na parvarish-e-naḳhl-e-ārzū karte

numū se pahle jo andesha-e-numū karte

suneñ na dil se to phir kyā paḌī thī ḳhāroñ ko

ki gul ko mahram-e-anjām-e-rañg-o-bū karte

gunāh thā bhī to kaisā gunāh-be-lazzat

qafas meñ baiTh ke kyā yād-e-rañg-o-bū karte

bahāna chāhtī thī maut bas na thā apnā

ki mezbānī-e-mehmān-e-hīla-e-jū karte

dalīl-e-rāh dil-e-shab charāġh thā tanhā

buland-o-past meñ guzrī hai justujū karte

azal se jo kashish-e-markazī ke the pāband

havā kī tarah vo kyā sair chār-sū karte

falak ne bhūl-bhulayyoñ meñ Daal rakkhā thā

ham un ko DhūñDte yā apnī justujū karte

asīr-e-hāl na murdoñ meñ haiñ na zindoñ meñ

zabān kaTtī hai aapas meñ guftugū karte

panāh miltī na ummīd-e-be-vafā ko kahīñ

havas-nasīb agar tark-e-ārzū karte

maza gunah ka jab tha ki ba-wazu karte

buton ko sajda bhi karte to qibla-ru karte

kabhi na parwarish-e-naKHl-e-arzu karte

numu se pahle jo andesha-e-numu karte

sunen na dil se to phir kya paDi thi KHaron ko

ki gul ko mahram-e-anjam-e-rang-o-bu karte

gunah tha bhi to kaisa gunah-be-lazzat

qafas mein baiTh ke kya yaad-e-rang-o-bu karte

bahana chahti thi maut bas na tha apna

ki mezbani-e-mehman-e-hila-e-ju karte

dalil-e-rah dil-e-shab charagh tha tanha

buland-o-past mein guzri hai justuju karte

azal se jo kashish-e-markazi ke the paband

hawa ki tarah wo kya sair chaar-su karte

falak ne bhul-bhulayyon mein Dal rakkha tha

hum un ko DhunDte ya apni justuju karte

asir-e-haal na murdon mein hain na zindon mein

zaban kaTti hai aapas mein guftugu karte

panah milti na ummid-e-be-wafa ko kahin

hawas-nasib agar tark-e-arzu karte